黃耀明前晚喺麥花臣場館舉行第2場「美麗的呼聲聽證會」，4月1日唔止係亞視熄機嘅日子，仲係港產電影《十年》喺街頭播映嘅大日子，明哥喺個唱中諷刺話：「終於被消失咗，好多人都想睇戲，但𠵱家睇戲唔係去戲院，原來係喺街睇。香港𠵱家真係越嚟越有趣，大家一定要留喺度，見證香港會變成點。」
導演歐文傑致歉
前晚有唔少內地觀眾捧場，明哥自嘲：「其實我都促進中港旅遊，不過我𠵱家上唔到去，要麻煩佢哋過嚟啦，香港旅遊發展局應該多謝我。」
由卓韻芝主持「龍門陣」環節訪問《十年》導演歐文傑、《哪一天我們會飛》導演黃修平同黃秋生，阿芝話《十年》入圍金像獎，但被內地拒播鬧出風波，歐文傑即致歉：「好對唔住，連累到金像獎。」講到對香港電影有乜睇法？秋生抵死話：「20年前都話香港電影就死，𠵱家好似我咁，死同唔死之間！」
問到唔少導演北上拍合拍片同內地審批香港劇本，黃修平強調自己電影自己拍，歐文傑就話自己嘅電影唔適合內地，秋生則爆多年前拍戲時，收到指引：「岳飛不是民族英雄，而是分裂民族的人。」至於柳俊江主持嘅「百萬富翁」環節就講亞視熄機，喺尾聲被「槍殺」嘅佢，突然彈起身話：「你越想我死，我就越唔死，人最緊要係乜嘢呀？獨立呀！」
撰文：馮仁昭