文家良馬房主帥巫斯義，跑完周日(3日)賽事後須開始停賽七期。睇番佢季內六次停賽前一戰，當中四次替文家良贏馬。今期文廐有「嘉福」及「駕喜」由巫斯義執韁，料屬馬房出擊重心，必力求起孖完成這兩駒贏馬任務。
第五場三班1000米，「嘉福」出道三戰獲一冠兩亞未失Q，三歲馬盡顯早熟速高之特性，上仗不敵「華盛高飛」而壓倒「勝利寶石」跑第二，後兩駒再出均繼續上名，可見水準不俗，等番首本之直路賽打王牌報名上陣，睇得出幕後再拼之決心，有力替巫斯義在停賽前贏馬。
此外，第二場五班1600米之「駕喜」今仗乃重投文家良馬房後首次上陣，上季初在文廐評50分贏馬，其後欠表現而轉投李易達，今次食回頭草，練者當然要贏馬省招牌。加上今季唔少文廐轉倉馬好快有頭馬交出，如「歡笑多多」及「榮華富貴」等便是最佳例子，「駕喜」比贏馬時已低12分，有力反彈。