CY話過政府會邀請今屆嘅區選年輕當選人加入諮詢架構，聽吓意見。以為佢講笑，今次卻係嚟真。意欲爭取連任，確實會令人身段放軟咁噃。
政府噚日公佈委任公民教育委員會8名新委員，任期今日起生效，為期兩年。8位新丁除咗有范徐麗泰囝囝范駿華，亦包括現年33歲嘅新民黨東涌北新任區議員傅曉琳、中大醫學院賽馬會公共衞生及基層醫療學院副院長陳英凝等。令八方眼前一亮卻係有位泛民議員在內喎！年僅30歲、但已第三度勝出東區太古城西區選嘅民主黨趙家賢（圖），榜上有名。
八方問過佢，佢話都係噚日傍晚先接獲通知，應承出任係覺得諮詢架構內真係要多啲唔同聲音，唔應該偏晒建制派嗰邊，一定會盡力提意見，佢仲自爆同委員會主席彭韻僖好有緣，皆因本身係律師嘅彭韻僖，當年為趙家賢證婚㗎！