龍湖地產（960）女老闆吳亞軍雖然已經51歲，但好似越來越醒神。佢近年來港主持業績會，衣着配搭感覺冇咁老土，髮型亦變得比較時髦，噚日見佢再剪短頭髮，感覺更加清新。
龍湖舊年生意興隆，賣樓賣得好，難怪吳亞軍噚日笑容多、心情靚。唔知係咪生意唔使佢操心咁多，佢多咗時間打扮，近年品味upgrade唔少，好似一把長髮越剪越短，越來越清爽，之前佢仲以捲髮上陣，今年就一頭輕盈短髮。
不過望真啲，佢身上件外套熟口熟面，好似早幾年業績會都着過。嘩，話晒都係內地女富豪，噚日龍湖市值610億元，佢唔使咁慳家呀嘛。
不過又咁講，龍湖一向以減債同風險控制做得好出晒名，吳老闆慳家唔買衫都唔出奇嘅。