恒生銀行（011）一姐李慧敏舊年加薪5.2%。根據恒生最新年報，李慧敏舊年總年薪2,171萬元，基本底薪其實冇乜點加，主要係現金與股份花紅部份有所增加。
恒生董事會3名執行董事，李慧敏人工較高，其餘兩位年薪都唔到900萬元，經常同大家講滙率、投資產品嘅馮孝忠，佢舊年總年薪840萬元，輕微加咗2.3%。負責零售銀行嘅陳力生，舊年嘅加薪幅度就大啲，加一成，袋850萬元。
李慧敏之前講過，薪酬與花紅安排視乎業績、個人表現，仲有市場薪酬趨勢而定，恒生舊年受惠於出售興業銀行股權而大賺，雖然阿媽滙豐控股（005）話過要凍薪，但後來都改變決定，𠵱家睇到恒生幾位執董都有人工加，普通員工應該都有得加人工啩。