民主黨主席劉慧卿做議員之前，曾經做過電視台記者，係30年前嘅新聞小花，報道時曾以吊帶背心裙上鏡，令人驚艷，今時今日仍然為人津津樂道。卿姐之前同傳媒茶敍，應承會喺議員惜別晚宴再次出動背心裙同大家合照，仲話唔會走數㖭。
八方點會驚卿姐走數？之不過條裙擺咗30年，真係仲着得……落？原來卿姐條裙真係keep得好好（當然身形都一樣），仲有相為證。八方發現佢喺2012年9月出席朋友聚會時，着過一次，當日仲巧遇港大前利瑪竇宿舍社監Father John Russell，佢同卿姐都相識多年。雖然吊帶背心裙重出江湖，但八方強烈建議卿姐喺惜別晚宴時，同時「還原」30年前造型，即係，唔好加件外套咁吝嗇囉！