做咗12年海洋公園行政總裁嘅苗樂文舊年講明唔續約，園方噚日宣佈副行政總裁暨首席財務總監李繩宗（Matthia，圖左）會坐正，成為首個華人CEO，7月1日上任，任期4年，人工幾多就無披露。
今年61歲嘅Matthia喺1994年加入海洋公園，名副其實係老臣子。主席孔令成話Matthia做嘢好細心，唔止計算叻，每年玩到癲嘅萬聖節哈囉喂都係由佢提出。
Matthia話上任後首要任務係面對旅遊業結構性問題，會積極推廣。本地則陸續有優惠，下月推出限量「優越卡」，全年入場外仲有「海洋快證」服務。為迎接南港島綫通車，Matthia指正籌備多啲夜間活動，吸引打工仔放工入園，亦考慮延長開放時間。