梁班子嘅做事方式，真係好有趣。好似倒泥頭咁吖，倒到幾層樓咁高好危險喎，有市民去抗議，警方卻係保護啲泥頭。開講有話，上行下效，唔通因為特首梁振英都疑似有將「廢物」周街棄置嘅習慣？
將便便推落樹底
事關有網民上載幾張CY放狗嘅相，配上一句咁嘅文字：「呢位狗主隻狗屙咗屎，竟然將啲屎推落樹下面，就咁用水沖一沖石屎地，我覺得行山都無所謂，但喺狗公園，好似唔太衞生喎！」
呢位叫Charlotte Loong嘅網民，喺網上貼咗幾張CY喺西九龍海濱長廊放狗嘅相，正面、背脊都有，惟獨唔見「屎我係一篤屎」嘅真身！佢留言話，有位狗主隻狗喺石屎地解決完之後，有人用樹葉之類嘅嘢將啲便便推落樹底，然後有助理就遞咗支水畀佢、沖吓個地就走人，全程冇提CY個名，但從相片推斷，無理由唔係講CY啩？！
其實CY出名鍾意調理農務，可能佢喺屋企聽老婆話，都慣咗用天然肥料種有機菜，所以將啲便便留低，「化作春泥更護花」?而對於唔執屎呢個咁大嘅指控，八方打過畀新聞統籌專員馮煒光求證，電話冇人聽。特首辦截稿前都冇回覆。
李八方
mailto:pf_lee@appledaily.com