今季雖然仲有大概兩個月先完，不過利物浦領隊高路普已為下季做準備，消息話佢好有信心以割引價嘅2,000萬鎊（約2.2億港元），喺拜仁慕尼黑簽入由佢一手提攜嘅德國球星馬里奧葛斯；若然真係成事，呢對昔日嘅「蜜蜂兵團」師徒，將會喺晏菲路重逢，再次合力打江山。
葛斯係高路普嘅得意門生之一，喺2009/10球季季中，當時教緊多蒙特嘅高路普將葛斯提升上A隊，而葛斯之後火速上位，仲幫蜜蜂兵團打冧拜仁而連奪2010/11及11/12兩季德甲冠軍。高路普將會喺今夏重組利物浦，葛斯當然成為佢嘅收購目標啦。雖然，葛斯家陣踢緊德甲班霸拜仁，但今季嘅發展唔係好如意，喺舊年10月頭因為大腿受傷而唞咗近四個月，好番之後又坐冷板多過踢，過去六場聯賽只係踢咗一場，仲要只係踢53分鐘咁大把，今季加加埋埋踢咗八場聯賽同入得一球；搞到連德國國家隊教練路維都開聲，希望佢可以坐低同拜仁傾吓前途問題，咪喺度浪費青春。
下年約滿拜仁或割價出售
查實葛斯嘅身價本來要至少3,000萬鎊，但係因為佢同拜仁份合約到下年6月30號屆滿，如果利物浦今個夏天想買佢，應該逼到拜仁將個價減到2,000萬鎊。呢位德國世盃決賽入波功臣可以踢前鋒、左右翼同埋進攻中場，所以高路普深信如果簽到佢，可以大大提升紅軍嘅攻擊力。
葛斯之前講過同高路普成日有聯絡：「我哋成日都互send短訊。佢係我喺多蒙特嘅教練，冇其他特別嘢。」雖則高路普對招攬葛斯信心無限，但當中亦存在變數，皆因拜仁今夏換帥，安察洛堤會接替哥迪奧拿執教，加上洛賓同列貝利都幾老，前者32歲，後者到四月亦滿33歲，話唔埋葛斯最終決定同拜仁續約留隊。
欲買根度簡或放「神軒」
除咗葛斯之外，高路普亦睇中科隆左閘祖拿斯赫達，但呢個25歲德國新晉國腳亦唔平，要成1,200萬鎊；至於高路普嘅舊部屬、同多蒙特喺明夏約滿嘅根度簡亦係佢嘅羅致對象。但係，據報由於高路普未必會有太多資金，如果佢想喺今夏簽新球員，先要清走陣中嘅瘀血，例如係賓迪基、巴洛迪利、洛夫雲同埋艾拔圖摩蘭奴等，聽聞連隊長佐敦軒達臣都冇得留低，好有機會俾高路普用嚟套現簽新兵。