【本報訊】平機會候任主席陳章明（圖）接受傳媒專訪自稱不保守，卻以「老同」來形容同性戀者。次文化堂社長彭志銘直指，陳章明以「老同」形容同性戀人士並不恰當，「老同」一詞意思為「道友」，即吸食白粉者，通常是警察用來形容吸毒者的術語，早於60、70年代已經使用。大愛同盟總幹事梁兆輝亦指，同志團體從未以「老同」自稱，直言陳章明用錯字眼。
警察術語 形容吸毒者
陳章明接受有線訪問時稱，自己並不保守，70年代時在英國參加男同志婚禮，認為立法禁性傾向歧視並非最好做法。他指，年輕人將支持同志平權與爭取民主運動扣連，並不是很有理性的政策討論，「佢（年輕人）淨係知道今日我要支持呢樣嘢，即使我唔係所謂『老同』，我都要支持呢樣嘢，因為呢樣嘢係民主必須要做嘅運動」。
次文化堂社長彭志銘指，「老同」意思為「道友」，是警察形容吸毒者的術語，自己亦未曾聽過以「老同」來形容同性戀者，「可能近年係有個咁嘅新潮語，咁佢（陳章明）講中咗囉」。大愛同盟總幹事梁兆輝亦指陳章明用錯字眼，目前仍疑中留情，希望在4月中與陳章明會面，了解他對同志平權的看法。
■記者潘柏林