民主黨單仲偕單雞出名係「政壇愛妻號」，同太太由中學開始，拍拖到結婚，多年來都咁恩愛。單仲偕近日仲喺facebook上載兩張相，一張係30年前喺中文大學影嘅結婚相（圖），另一張則啱啱喺意大利旅行慶祝結婚周年時影嘅，認真甜到漏！
八方問過呢位癡心情長劍，佢話呀，今次趁復活節假同太太二人世界遊意大利，重點係順道慶祝30周年珍珠婚紀念，幾乎係再次度蜜月咁滯！咁，送咗乜嘢畀太太呀？佢笑笑口話，去到意大利梗係有好多嘢買啦，例如女士最愛嘅包包啦！單仲偕講明來屆立會唔再選，更喺早前黨慶「被金盆洗手」（點解係「被」？據聞洗手者事前唔知有呢個環節㗎），相信卸任後更多時間同太太拍拖嘆世界咯。