【本報訊】夢見逝世多年的丈夫是10年前的事。李愛兒說手術失敗，就跳樓自殺，丈夫夢中安撫，「細路哥養到咁大，你捨得咩？」醒來了右眼被割除，左眼只餘兩成視力，她保住了性命，5年前提起畫筆，畫盡萬千風景，小橋流水和古堡大宅；年屆80歲初辦人生首個畫展，她用那矇矓左眼，畫出色彩斑斕的晚霞。
遭中共批鬥家破人亡
「幅畫得5分，唔係畫得幾好。」畫班上愛兒婆婆臨摹風景畫，她筆下的天空呈藍黃色，枯樹添上了幾瓣紅花，那看似歐陸式的古老大宅帶有幾分圍村祠堂的情調，但她不太滿意，指着大宅的窗框說，「配色唔係幾好，呢度啲色水唔啱，應該配淺啡色」。有時作畫，她要用放大鏡，「我一隻眼睇到兩成咋，呢隻係假眼，攞得到出嚟」。
愛兒有腦腫瘤，接近大動脈，無法切除，10年前要施手術割去右眼減輕腦壓。在手術台上，她夢見丈夫，「我話瞎咗就唔喺呢度住，去最高度住，呢度跌唔死我，跌唔死又辛苦」。丈夫勸阻：「佢話會好番，你想啲咁壞嘅嘢，細路哥養到咁大，你捨得咩？」夢醒來，失去了右眼，左眼只剩兩成視力，她選擇活下去。
愛兒在廣州出世，有7兄姊是家中孻女；父親做生意，有3間舖。她說一家人逃過日本侵華，但躲不過共產黨，店舖被沒收，4個哥哥被指是反革命遭槍殺再沒埋，其中兩個孖生，「幾陰功呀，我家姐親手挖番啲細佬出嚟」。那時她已來港，家破人亡是聽姊姊憶述，「阿爸阿媽見仔女打靶死，就吊頸死」。
沒讀過書，愛兒來港後在紗廠當女工，後來結識當則師的丈夫，32歲那年，丈夫心臟病發離世，一個女人捱大5子女。愛兒5年前接觸藝術，是東華三院愛不同藝術課程3年級學生。最近她舉行首個畫展，展期至4月10日，於西環域多利道1號百年大樓第二座地下1號舖愛不同藝術空間展，查詢可致電2870 9224。
■記者王家文