剛接任民協主席嘅九龍城前區議員莫嘉嫻，身高173cm（5呎8吋），對於女性嚟講，絕對係高人一等，而佢喺中小學年代，大家都唔會意外，佢永遠都要坐最後一排，排隊時呢，當然一定由尾數上嘅第一或第二個啦！
搵老公同從政都有着數
高妹孤高總是追不到？已婚育有兩女嘅嘉嫻話，物色男朋友時，咁高都有好處，就係令佢縮窄範圍，皆因唔太接受老公矮過佢。從政嚟講，人高有乜好處？嘉嫻話，佢一開街站，街坊喺下一個街口已經見到佢，好似幾着數咁喎！
手長腳長嘅嘉嫻，原來曾經係女飛人，極具爆炸力，小學已喺學校短跑嶄露頭角，越跑就越快，中學時代表學校出征學界田徑比賽，100米賽事嘅個人最佳時間係11秒幾，真係勁揪。如果政界有個田徑比賽，嘉嫻應該攞咗100米金牌。其實，跑步從來係民協嘅強項，民協試過派40人跑渣馬。馮檢基亦經常現身渣馬名人組，阿基助理李健勤亦係馬拉松能手。加埋嘉嫻呢位短跑健將，不妨搞跑步訓練班力抗蛇齋餅糭嘞！