靚靚兔女郎大家就見得多，四眼兔佬大家又見過未？成個復活節假，新民黨田北辰都戴住兔仔耳，變身兔佬喺荃灣、屯門、元朗、天水圍同葵青區蹦蹦跳，喺「田叔叔工作坊」同居民打成一片。
唔知係咪喺大佬田北俊身上學識靚抽？田二少喺facebook借復活節周圍走，勁抽教育局局長吳得掂水，引述有同事話見佢馬不停蹄於是建議：「不如你就咁坐喺車入面，隔住車窗同啲街坊打招呼就算啦，仲可以玩住手機㖭。」田二少則話：「梗係吳得掂啦，我身為民選議員，點可以唔同街坊交流，吳落車呢？」佢仲話去到元朗真係俾班「學生」圍住唔走得，但呢班唔係中學生、而係玩到唔畀佢走嘅幾歲細路仔，結論係：「呢個世界好多時貼地係有意想不到嘅回報。」