【本報訊】雖然與本土派價值及策略有別，但吳文遠於訪問中表明，對曾參與新界東立法會補選的本土民主前線梁天琦予以尊重，感到梁是「真心、有心去做」，但對於梁天琦敗陣後翌日、挾梁的逾6萬票氣勢舉行記者會預告參選的黃毓民、熱血公民黃洋達及提倡城邦論的學者陳雲等，吳狠批他們多年來「一時一樣」，「基本上係冇政治誠信」。
秉持原則無懼抹黑
對於曾為社民連創黨主席、於2011年退黨的黃毓民，吳文遠斥他不斷刻意製造假想敵，例如花大量時間抹黑社民連前主席梁國雄，藉此誤導其他人，令一般人變成偏聽、罔顧事實，「明明長毛拉緊布嘅時候，你話長毛唔拉布，咁你仲有乜道理好講呢？」
而梁天琦在旺角騷亂後即獲黃毓民等人力捧，吳文遠更忿忿不平，指黃毓民「利用年輕人嘅滿腔熱血、佢哋嘅真誠去達到自己嘅政治目的，呢個就係最卑鄙、我最睇唔起嘅手段」。
至於人稱「國師」的陳雲，吳亦指他對女性、新移民、窮人都帶有歧視，「以社會矛盾帶出嚟嘅仇恨同埋恐懼嚟做佢嘅主調」，例如倡議選舉中要泛民、社民連等「死先」的「焦土策略」，「好明顯係白癡嘅策略」，目的只為「鞏固自己嘅支持者，同埋鞏固自己嘅權力」，尤其「佢冇講到焦土之後下一步喎，淨係焦咗先喎」。
以39歲之齡執掌社民連，吳文遠強調會秉持講事實與道理原則，尊重不同意見，面對抹黑、惡意攻擊拒絕讓步，「（會）指番出個事實叫人哋睇清楚」，強調社民連會維持政黨的道德責任，「第一個行前，最尾一個走」，冀令政府明白他們並不畏懼，同時給予市民希望。
■記者呂浩然