特首梁振英早前都以驚世名言「三條跑道總好過兩條」力撐造價逾1,410億元嘅機場第三條跑道，而機管局就梗係乘勢配合去馬，近日喺facebook專頁宣傳「你想機場設計比賽」，邀請網民發揮「天馬行空的創意」、「瘋狂鬼馬主意」，點知又引發「關公災難」，網民紛紛嘲諷，而有黑英之稱嘅天文台前台長林超英更加剝花生，話啲留言很好看。
機管局喺fb專頁宣傳比賽時率先拋出提議：「飛機改裝的膠囊旅館、應有盡有的健身室、遊樂場甚至是動物農莊？」
網民嘲起泳池 種有機菜
雖則話畀網民思考，但網民唔領情，大多留言嘲諷，除咗要求撤回工程，又有人建議起泳池同溫室種有機菜，明寸CY兩公婆。
其中Dennis Yung留言反駁，話應該「改善吓行李帶，登機橋，其他咩健身室請收皮」，又暗寸「搭得飛機都係趕時間，仲得閒同你去玩gym？」其後又大鬧千幾億可以喺全球任何一個城市，興建最先進嘅機場，而唔係一條跑道囉，結果讚好數目多於原帖嘅百幾個。
見到咁多「瘋狂鬼馬主意」，唔少人似乎「喜出望外」；一直反對三跑嘅天文台前台長林超英亦喺fb分享帖文，佢冇拋出建議，只係留言話喎：「告訴機管局你想點，留言很好看。」估唔到退休後嘅黑英都做咗花生友。
識睇睇留言
Eva Ng：當然要有解放軍駐守、起個酒池肉林骨場，等我國佳麗一展好客之道，令外國旅客賓至如歸。起番個紀念中華海豚展館，記得上香！
Kenneth Lam：起多個運動場館，場外一定要禁止做運動，而場館個期永遠俾人book晒去開校務會議，既遠離校園又夠偏僻，啱晒校委會主席心意。
Alex Poon：起個墳場啦，骨灰龕位都得㗎。咁起碼我哋啲香港人死晒都有個靚景睇吓呀嘛！
Mia Ray：建議擺份TSA卷，日常家課冊……等遊客知道香港8歲小朋友，可以一分鐘計一條數都面不改容。
資料來源：機管局facebook
李八方
mailto:pf_lee@appledaily.com