想了解馬騮個性？下個月有機會嘞！香港動植物公園會喺4月2日同3日（周六及下周日），一連兩日舉辦「動物護理聚談」活動，旨在畀大家近距離觀賞今年嘅生肖動物──猴子！
到底要湊呢班跳嚟跳去嘅馬騮以及其他靈長類動物，例如婆羅洲猩猩、紅頰黑猿、皇狨猴、金頭獅狨猴、侏狨、領狐猴和環尾狐猴等，有乜嘢苦與樂？而喺保育工作方面，又有乜心得可以分享？屆時園方嘅資深動物飼養員，會向遊人逐一解說。呢次活動係「2016香港科學節」其中一個活動項目，費用全免，有興趣參加嘅市民可以喺活動當日上午10點、或下午2點喺動植物公園嘅教育及展覽中心詢問處集合，詳情可以喺辦公時間內致電2530 0154查詢。