港足嘅世盃夢告一段落，但南韓主帥金判坤為港足帶嚟深遠嘅影響，就連前曼聯球星朴智星，噚日應邀出席沙田馬場「同心同步同樂日」都話知Kim sir勁，呢位南韓最受歡迎綜藝節目《Running Man》常客，同日更見證香港千位學生，成功刷新一個鐘合作完成3,745.38米長打氣紙圈鏈嘅世界紀錄。
見證學生破健力士紀錄
一身track suit似足RM打扮嘅朴智星，噚日一早就到咗沙田馬場，又見證健力士紀錄、又同小學生踢波、又接受採訪，但佢個個場合都笑笑口。港足呢排夠hit，咁啱主帥又係南韓人，當然唔少得問星仔識唔識Kim sir，英文唔錯嘅佢話：「我細個踢波時，已聽聞Kim係個好好嘅球員，雖然冇同佢正式接觸過，但聽過佢幫港足嘅事，好戥佢高興。」
當問到星仔仲會唔會再上RM，上年底做咗爸爸嘅星仔話：「我已經上過四次RM，主要係為我個基金會去，因為節目受歡迎，想上節目後可以吸引更多人捐錢去基金會，等更多亞洲足球落後地區或者愛好足球嘅小朋友受惠，我都幾享受呢個節目。」
已經35歲嘅星仔，喺2014年中退役後，不斷以曼聯傳奇球星名義四圍飛，幫手推廣青少年足球，好似噚日佢有機會同香港小朋友踢波已經好開心，但就未諗過要做教練。
講到2018年俄羅斯世盃，星仔就話希望南韓至少殺入八強：「南韓始終同歐洲、南美隊有段距離，但因為南韓球員去歐洲搵食，所以距離已經細咗。」佢預測家陣效力熱刺嘅南韓國腳孫興民，可以成為國家隊領軍人物。
珊珊睇好港將里奧奪金
噚日同場仲有「風之后」李麗珊同四位準奧運代表，包括羽球混雙李晉熙、周凱華、風帆盧善琳同殘奧輪椅劍擊金牌余翠怡，賽馬會仲同體院公佈八月里奧同九月殘奧嘅獎金，里奧個人金牌照舊300萬港元，而殘奧金牌就加咗10萬去到40萬港元。珊珊以四字真言「放鬆心情」贈師妹盧善琳外，仲預測今屆里奧會有港將攞到300萬金牌獎金，但佢就保持神秘，冇講睇好邊個囉。