上星期五有場尼日利亞對埃及嘅非國盃外圍賽，一睇場波啲相，真係嚇到O晒嘴！唔係啲球員踢到好似美斯咁勁，而係球迷簡直多到好似螞蟻摟蜜糖咁，你係見唔到看台上有一絲嘅空位！場邊草地，坐滿人；觀眾上嘅高台，爬滿人；球場大螢幕上，企滿人；就連望落超過10層樓高嘅大光燈，都有人喺上面睇波！
呢度係尼日利亞嘅阿馬度比拿球場，本身可以容納2.5萬人，但喺前日呢場非國外，當局就搞免費入場，開晒啲閘等人入，但又唔做人流管理，結果湧咗四萬人入場！
2.5萬人球場塞四萬球迷
場邊記者都嚇到鼻哥窿冇肉，認為呢場實踢唔成；但非洲波嘅嘢，真係好難估，場波如常進行，尼日利亞靠奧漢加路入波領先，但被埃及嘅穆罕默德沙拿追成1:1完場。雖然入場人數達到可容納量嘅1.6倍，主隊仲要贏唔到，但好在冇慘劇發生，企喺高台啲球迷都安全落返嚟，冇人傷亡。喺呢場，效力阿仙奴嘅翼鋒伊禾比首次為尼國上陣，而車路士嘅約翰米基爾就首次做尼日利亞隊長。講起非洲波，其實香港都有，有組織今日晏晝舉行Unity Cup足球友誼賽，有七支由非洲人組成嘅業餘波，同埋一支香港人球隊喺大角嘴切磋球技。