香港曾經有一個外號，就係「文化沙漠」，左丁山係傳媒界中人，唔知傳媒算唔算係文化一部份呢？如果算埋，香港就一定唔係文化沙漠啦，香港媒體咁活躍，每日出版中英文日報之多，可能係亞洲第一，遠勝新加坡，多過台北，超過東京，夠晒威風，可惜近年印刷媒體受網媒衝擊，廣告收益日差，本地印媒可能慢慢陰乾，黃金時代已過。中貿林話近日有兩份周刊出版，好似有啲聲勢，於是去報攤買嚟睇吓。在灣仔街頭行咗一輪，卒之搵到嘞，就係「號碼」周刊，順口問吓報販：「呢份新周刊咁難搵嘅，你賣晒嘞，每次賣幾多份呀？」報販瞪咗中貿林一眼：「好賣就唔駛等到你嚟啦，咪賣咗一份咁大把囉，多謝晒你先至有得發市。」
中貿林打電話嚟問左丁山：「你睇過號碼周刊未？」NOW嘅新聞台播出嘅廣告就睇過，周刊就未見過，當然更未睇過。中貿林講：「唉，估唔到依家周刊市場咁慘淡，我都戥你地傳媒人牙煙，遲早冇得撈。」冇得撈係如今新聞系學生之事，左丁山呢類人已隨時準備收山，自然無力挽狂瀾，一切順其自然可也。香港不少學生讀書選主修，將「前途」與「錢途」混為一談，要揀有工作升遷前景嘅搵銀科目去讀，咁就千祈唔好揀入新聞系，最有「錢途」嘅科目會係IT加創意，最好主修電腦訊息科學，副修藝術，雙主修更佳，之後再加一個MBA，就成為21世紀大企業，新企業CEO嘅基本材料，當然還要語文好，自小立志要成為學者教授嘅，另作別論，純理科、純文科（文史哲）皆需要新一代一流教授替補上一代，如果做得成21世紀嘅錢唐牟，足以名留中國學術史，光宗耀祖。讀科學好似比較容易啲超越上一代噃，前人種果後人收，上一輩學者培養下一代科研人才，最喜歡見到終有一日，弟子學術地位超越自己。新亞書院生物系創辦人任國榮教授培養咗不少一流學者，左丁山知道起碼有兩位嘅世界知名度及學術地位已超越任教授，就係徐立之與辛世文，去年新亞書院舉辦第一屆「任國榮先生生命科學講座」，由徐立之主講，今年舉辦第二屆，就請得任先生大弟子辛世文教授（1966生物）主講，分別在四月十一日、四月十五日，及四月十六日演講三次，題目有科學創新，研究動力，及創新的源頭活水，分別於中大及尖沙嘴香港科學館舉行，詳情可打電話3943 3739向新亞查詢。辛教授之稻米、水稻研究，聞名世界，係中國工程院院士，有志研讀科學者不可錯過佢嘅演講。