香港有機資源中心噚日喺中環遮打花園舉辦一年一度嘅「全城有機日」（圖），請咗特首夫人梁唐青儀出席，梁太同食衞局副局長陳肇始及立法會議員葛珮帆等試食有機早餐，仲一齊表演煮飯仔，梁太幫手煮有機炒飯，落手落腳切菜同炒餸，佢話平時都盡量買有機食材，連蔬菜都係自己種，即摘即食，仲叫市民可以返屋企試下喎！
梁太究竟係唔知香港土地問題嚴重，定係想學另一半搞gag𠱁大家開心？𠵱家啲屋豆腐膶咁細，連豪宅都細到劏房咁，市民可以喺屋企邊度種菜呢？除非個個間屋都好似禮賓府咁大，大家先可以種花種菜再擺上facebook呃like（或者呃嬲）啫！