雖然叮噹中文譯名已經改做「多啦A夢」，但無礙大家高叫「叮噹呀！誰都喜歡你！」噚日朝早就有過萬名市民化身「進擊的叮噹」，有人戴上叮噹頭套，有人則畫咗貓鬚，跑入西九文化區西九海濱長廊，參加首次移師香港舉行嘅「DORAEMON RUN 2016」，現場仲有同人一樣咁高嘅大雄同叮噹為參賽者打氣。
而其中嘅2公里繽紛賽，更要越過三個障礙關卡，包括巨型滑梯、三角迷陣同水管隧道，參加者可以邊跑邊喺沿途多個多啦Ａ夢拍照區影相留念。