立法會研究標準工時相關事宜小組委員會噚日舉行公聽會，名為「香港洗頭艇從業人員總公會」嘅組織，上周三由「委員長宋又新」以書面提交意見（圖），表明支持真標準工時，反對政府推出嘅假方案。
呢位洗頭艇從業員話喎，洗頭艇業近60年來「日以繼夜、夜以繼日」為香港民眾提供不受拘束嘅娛樂體驗，以自己方式擺脫都市嘅喧囂，「為求旅人行程全程保持隱暱，船員經常須夜間陰暗的環境下提供服務，時常和怒海搏鬥」，話因為長時間作業，唔少業已患上「難治職業病」，更有船員因過度疲憊下操縱船隻導致海難。
嘩，咁搞鬼嘅組織，八方都好想見下佢哋嘅廬山真面目，點知原定代表公會出席嘅「總水手安柏造」，最終甩底冇現身，未知佢係出咗海開工，定係突然「被失蹤」？