今年1月天文台低估寒潮威力，預報同實際溫度有3度嘅誤差，俾網民埋怨預測唔準。天文台台長岑智明噚日就話，預報員事後都「耿耿於懷」㗎，會吸取經驗，以後多啲同華南地區氣象機構合作。台長仲話，會留意唔同氣象機構嘅預測數字，做到知己知彼；有記者問會唔會開番個天文台facebook專頁？台長笑笑口話，add佢facebook都得㗎。
台長噚日見記者，冇展示佢心愛嘅氣象歷史圖片，反而化身「錶模」任影唔嬲（圖），因為天文台App嚟緊會登陸Apple Watch。據講天文台App下載次數已有550萬次，贏盡其他部門喎！