最近唔少立法會建制派都要飲涼茶下火，咪以為佢哋純粹被泛民喺財委會嘅抗爭行動激親，八方打聽過，發現另有原因，原來係一男子嘅訪問，令到佢哋非常激憤，但呢位一男子唔係禮賓府主人，而係佢身邊嘅所謂謀臣（定讒臣？）──中央政策組首席顧問邵善波，建制派近期私下叫佢「躁狂波」，諷刺佢一味姓賴圖卸責！
查實邵善波同建制派議員唔算close，向來冇乜交往，有建制派話喎，佢思想太左嘞（嗱，連建制派都頂佢唔順，可想而知……）。
「每月10萬蚊糧都不來」
本來大家各不統屬，理得佢獻咗乜好橋或屎橋畀梁特吖，點知身為特首智囊嘅邵善波，近日接受傳媒訪問時談及議會運作唔順暢，竟然將責任卸晒去建制派議員身上，發炮大鬧：「40幾個人（建制派）各自搞搞震」，「不要說撐不撐政府，你自己負責的東西，每月出10萬蚊糧你都不來」，轟建制派唔團結兼唔負責任，完全冇協調喎！
據聞建制派議員睇到呢篇訪問都眼火爆，互相傳閱時幾乎粗口橫飛，有人嬲嬲豬話喎，唔係你呢個特區政府咁鬼爛，佢哋使鬼成日坐定定反拉布兼護航？大鬧邵善波唔反省政府出咗乜問題，反而走嚟怪責佢哋唔團結，呢啲係咪叫忘恩負義？仲話睇佢喺訪問中嘅態度，情緒好波動咁噃，私下封咗佢為「躁狂波」，似乎以為乜都賴人，自己就可以甩身咁噃！
李八方
mailto:pf_lee@appledaily.com