連續幾日都有令人不愉快新聞，今期人人壓力大，莘莘學子同上班族除了要練就抗壓力，靠「外力」令自己變得開心更重要。英國最佳營養學會（Institute Of Optimum Nutrition）專家Melinda Amato就選出七種令人食完會開心的食物，大家不妨試試。
一、朱古力
開心指數：●●●●●（五●分滿分）
可可豆含有N-醯基膽胺（ N-acylethanolamine），可以刺激大腦分泌安多酚（Endorphin），即身體自行分泌的興奮及舒適感覺元素。科學家仲話食朱古力可以提高靈敏度，不過大家記得白朱古力係冇可可成份的！
二、士多啤梨
開心指數：●●●●○
含有豐富維他命C，可以幫助安多酚分泌同吸收鐵質。每100克士多啤梨亦含約200毫克鉀，適量攝取可維持心肌功能、腎臟、神經系統同腸胃功能運作。唔只咁，士多啤梨仲有抗氧化作用，食完人都靚啲。
三、提子
開心指數：●●●●○
同樣有大量維他命C，可以產生安多酚，紅提子同黑提子仲含有多酚（polyphenols），抗氧化同時保護心臟。但提子的果糖含量相對較高，糖尿病患者不宜多食！
四、意粉
開心指數：●●●○○
意粉有複合碳水化合物，飽肚同時慢慢釋放身體所需能量。意粉仲有色氨酸同L-苯丙氨酸，同樣可以幫助生產安多酚。食全麥製意粉有更多纖維同維他命B雜，更加健康。
五、香蕉
開心指數：●●●○○
含有豐富鉀質，幫你維持神經系統功能運作，香蕉所含果糖亦可以快速補充血糖，仲有碳水化合物，食完成個人即刻精神晒。
六、堅果
開心指數：●●●○○
含豐富維他命B雜、蛋白質同硒（selenium），研究顯示硒有對情緒正向影響成份，其中巴西堅果（Brazil Nuts）每盎司含544微克硒，屬各種堅果類中含硒量最高。雖然堅果熱量同卡路里都高，但佢含不飽和脂肪同不含膽固醇，都算係良好嘅脂肪來源。
七、芝麻籽
開心指數：●●●○○
含維他命E、鈣質、鎂同鐵質，一方面可以抗氧化，亦可以保持身體血紅素（hemoglobin）含量，減少貧血所帶來嘅身體不適。鎂同維他命E可以令腦細胞更活躍，個人轉數快啲。
來源：DailyMail、Healthyremedy
記者：黃樂雯