美國總統選舉進行得如火如荼，就連冇投票權嘅「末日博士」麥嘉華都湊熱鬧。瑞士人麥嘉華噚日接受外國傳媒訪問，除咗一貫對市場嘅悲觀睇法，仲透露佢希望美國富商特朗普（Donald Trump）當選為美國總統。
麥嘉華話，支持特朗普，係覺得佢會為美國政治帶來新氣象，佢亦係唯一一個能夠擊敗民主黨希拉莉嘅共和黨總統參選人。麥嘉華仲話，如果佢係美國人，佢會做任何事去阻止希拉莉做美國總統。
但有口痕友懷疑，麥嘉華支持特朗普嘅真正原因，係想美國滅亡，事關外國相片分享網站Imgur近日有張圖片指，今次無論邊位候選人當選美國總統都具歷史意義，希拉莉屬美國首位女總統，如果特朗普當選，就係「美國最後一位總統」，麥嘉華支持佢，原來係「真．末日博士」。