萬科（2202）日前引入深圳地鐵做股東，令一場股權爭奪戰更有睇頭，寶能作為狙擊一方，唔知會否出招反擊。而喺呢個緊張關頭，公司高級副總裁譚華杰竟然向傳媒講拜拜呀。
話說萬科噚日在港舉行業績會，譚華杰一向負責讀晒成份業績報告，讀到最尾，佢忽然話「今次是我最後一次站在這裏和大家做滙報，有些依依不捨……」，佢呢吓認真嚇人一跳，事關佢係公司親善大使，傳媒平日搵佢攞料，佢答得就答，喺內房股當中都算罕有。
好在萬科總裁郁亮隨即澄清，指譚華杰唔係離開萬科，而係佢舊年由董秘，升做高級副總裁，有其他任務啫。
譚華杰除咗為人和善，仲有一道神技。萬科份業績報告有30、40頁，譚華杰可以唔睇稿，讀足45分鐘，其間連水都唔使飲，發現公關揭錯頁仲會擺手提醒對方，都咪話唔堅。