身兼愛情小說作家嘅白鴿黨元朗區議員鄺俊宇，原創作品原來有機會拍成電影。鄺俊宇向八方透露，𠵱家一星期除咗要寫12個專欄，每隔兩個月仲會推出《朗屏向前跑！》地區雜誌，當中有看圖找不同遊戲（圖），唔少街坊都好捧場，高𥧌時試過有近500個街坊玩完後去佢議辦換小禮物，有助同街坊加強溝通。佢補充雖然寫作繁忙，但冇疏於地區工作，屬新界西嘅佢接嘅個案由港島至長沙灣都有。
佢近日另有新計劃，透露會就《在微時，再遇我們的幸福》小說開拍電影，原來上年12月已去過台中市睇景，故事講述一個女記者同攝影師嘅故事，導演好大機會係台灣知名導演陳映之，內容會觸及地產霸權等等。佢計劃男女角要由香港人同台灣人演出，話最重要係要支持民主，仲點名話《狂舞派》嘅顏卓靈唔錯喎。