民建聯立法會議員黃定光今個禮拜相當free，事關佢太太、工聯會會長兼全國政協委員林淑儀去咗北京開兩會，立法會又休息喎，趁有空檔，象哥請傳媒到上環嘅中出會所試食水蒸鍋。
中出會所食大閘蟹出晒名，但象哥因膽固醇問題近年冇食咯，佢話連啲高官都唔食，於是去年初引入喺內地食過嘅水蒸鍋，個鍋有兩層，下層放米上層蒸海鮮，中間用一塊通窿鐵板隔住，蒸海鮮嘅汁流落下層煲粥。象哥話每套工具包括蒸氣機連煲等只係3,000人仔左右，噚日清蒸鮑魚、龍蝦、魚同蝦等，食到八方都舔舔脷。
象哥爆料話首個試食水蒸鍋嘅官員係財爺曾俊華，舊年蟹季前試完大讚，最後食粥嗰陣仲問有冇油炸鬼㖭。食衞局長高永文則讚呢個食法夠健康，可惜中出會所只招待會員，一般市民未必可以享用到咯！