尖沙嘴街坊福利會噚日舉辦烹飪比賽慶三八婦女節，邀請藝員、政府部門同長者組織派員參加，仲請嚟同教煮餸嘅乜太有啲餅印feel嘅特首夫人梁唐青儀做主禮嘉賓。八方見到梁太，梗係期望佢露番兩手，但佢主禮後急急腳走人，冇教吓龍蝦伊麵點煮先好食。佢喺台上唔教煮餸反而講歷史，致辭大談三八婦女節起源，話係70年代美國婦運熾熱而起，1975年聯合國正式將3月8日定為國際婦女節。
但佢講解放婦女運動時強調最先喺中國發生喎，話1949年建國後毛澤東力倡男女平權，仲提起1955年貴州堡子村為鼓勵農業生產，率先喺合作社內實現男女同工同酬，生產力大增，之後喺各鄉照辦，話中國較歐美國家更早落實婦女平權喎！嘩，婦女節都要咁政治正確？既然中國咁重視平權，唔知幾時喺呢方面超英趕美？