一直被視為特首黑馬嘅陳智思，身在北京接受兩間傳媒訪問時提到，5至10年內唔會考慮選特首，因為睇唔到理由放棄現時嘅職業及解決到當前香港問題。佢話梁振英若然有興趣連任會歡迎，但亦歡迎更多有心人參選，因為冇人想見到自動當選嘅特首。
梁振英嘅作風同表達方式令人覺得強硬，陳智思指做得特首，同社會唔同界別長期溝通係必須，認為CY喺呢方面做得明顯唔足夠。回歸後三屆政府都擔任行會成員嘅陳智思仲講明，今屆任滿後唔會再做，因為可以畀嘅意見都畀咗，應該畀新人試吓，「我太舊電池，太多委員會都有我個名，對其他人唔公平」。