屋邨仔情傾古典音樂，邊個話冇可能？翠屏邨長大、嚟自單親家庭嘅鄺展維，雖則阿媽愛聽鄭少秋，但冇影響佢古典樂之路，小五首次接觸單簧管，16歲學鋼琴，仲話細個時喺碌架床用discman聽古典音樂。
中大音樂系畢業後，鄺展維攞獎學金去英國完成作曲碩士同博士學位，2014年僅29歲就獲香港小交響樂團垂青，委託創作開場曲，帶嚟首筆可觀收入。能夠以現代古典音樂謀生，呢位作曲家話最感激媽媽從來唔介意佢讀音樂可能會搵唔到食。
佢最近聯同香港創樂團同講古佬雄仔叔叔嚟個現場音樂加講故事嘅crossover，周日下晝3點15分會喺西九文化區嘅自由約，免費表演一場音樂同故事嘅創作，5位樂手會演繹佢為故事度身創作嘅音樂，大小朋友屆時可聽到一場有關未來、由憂患到希望嘅故事。