特首梁振英真係真心真意推動創意產業嘅箒！佢噚日喺網誌提出，中環上班族用15分鐘食個light lunch，跟住可以去海濱釣魚，又提議如果將來喺中環ifc附近興建現代化嘅岸邊泳棚，中環打工仔飯後咪可以游水20分鐘囉！嘩，聽落好似好疏乎，但查實咁樣叫冇常識，有救生員叫廣大市民千祈唔好咁做，因為食飽飯游水會胃抽筋㗎，若然嘔到成個海都係，咁就唔好啦！
倡中環起泳棚 網民angry
中環打工仔平日已經要排長龍等買飯，可以搵到個位食個頹飯已經係福氣，CY或者有UGL嘅5,000萬而唔使喺中環捱騾仔，所以可以喺網誌講堅離地說話：「如果可以在ifc一帶，建個現代化的岸邊泳棚，午飯後游二十分鐘，是去gym以外的好選擇。」
本身係救生員兼港九拯溺員工會發言人郭紹傑話，康文署千叮萬囑叫泳客唔好飽肚游水，家吓梁振英唱反調，叫人飯後去游水，真係太冇常識。一個鐘內完成買飯、食飯、落海游水再換衫返公司，咁搞法，泳客一定抽晒筋，嘔到一海都係。
郭紹傑話CY不食人間煙火，唔明白中環打工仔一個鐘食飯係幾咁趕，難怪好多網民都批評：「有常識都知食飽飯不適宜游水。」一個「何不食肉糜」嘅離地建議，逾7,000個網民集體angry，可見CY幾咁「叻豬」。
識睇睇留言
Lau Hoi：拉筋換衫沖涼吹頭都幾十分鐘啦，仲未計你要行過去同行返公司，你估個個返中環係返ifc呀?!
Ng Herman：Good Idea
Eunice Chan：一定盲腸炎，689真係會害人
家姐 細：有二十分鐘游水，我諗係只有689最夠時間去。
Stare Cat：條友係咪被虐狂？當大家鬧佢、鬧到唔想理佢，佢都繼續做嘢撩交嗌！
資料來源：《蘋果》網頁
李八方
mailto:pf_lee@appledaily.com