香港年輕人越嚟越多人認同本土思潮，唔單止令北京領導頭痕，連一班當年有份參與香港回歸嘅退休北京官員，亦都好不滿，港澳辦前副主任陳佐洱開腔唔知鬧咗幾多次，今次就輪到當年有「小肥張」之稱、新華社香港分社前副社長張浚生出手，話呢班支持本土年輕人唔理解《基本法》，仲話當年佢哋起草《基本法》嘅時候，呢班後生仔只係未形成嘅細胞。
何俊仁：out爆冇說服力
話說𠵱家喺浙江大學做發展委員會主席嘅張浚生接受有線電視訪問，佢當年喺新華社香港分社做副社長嘅時候，已經出名言論極左，估唔到咁多年冇變。佢除咗鬧立法會拉布，話泛民唔應該百分之百反對政府，仲話年初一晚旺角騷亂係暴動，原因係對青年人教育不足，再加上受外部勢力策動，仲話喺政界爭議入面，睇到香港青年唔理解《基本法》，仲喺訪問入面笑笑口話，「《基本法》起草時，這些同學你那時候還不知道在哪裏，說難聽一點是細胞還未形成」。
不過呢啲咁左嘅言論，十幾廿年前香港人都唔接受，何況今時今日年輕人？有高登網民就改佢句說話恥笑，話香港開埠時候，中華人民共和國都未形成喇！又話張浚生出世嘅時候，《基本法》起草都未形成！
當年叫做同小肥張有隔空開片嘅民主黨何俊仁同八方話，其實小肥張已經out咗好耐、過晒氣，佢嘅「細胞未形成論」，對香港年輕人完全冇說服力，「啲後生仔都可以話佢（張浚生）幾年後都唔知喺邊度啦！」而年輕人國家意識越來越薄弱，顯示一國兩制失敗，「最大問題係北京不知反省」。
李八方
mailto:pf_lee@appledaily.com