呢日恒常飯局排期輪到會長C請食飯，席設上海總會董事房，點知會長C臨時有事，無時間出席，改由賓架R主持，而賓架R係多個會所會員，偏偏唔係上海總會會員，於是佢要左丁山簽單找數，呢啲事情經常會發生，照簽可也，唔通會長C會唔找數咩。
但不常發生之事這日發生了，超級食家、地產F對蒸河鱔唔滿意，認為太硬，對鍋貼唔滿意，認為太「行貨」，對其他菜式亦有批評。於是在座老友建議下一餐食飯改去「浙江軒」，比較吓邊個好喎。下一次邊個做東呀，秘書N記得晒，就係輪到左丁山，咁就一於去浙江軒囉，左丁山係第一批會員，當時入會費係2000元，聽講現在入會費係8000元，但冇去好耐咯（因難以訂位），不知現時水準如何。
賓架R話最近聽到八卦朋友講，一位年輕有名氣嘅風水師話下任特首係有鬍鬚嘅，佢問：「即係邊位呢？」眾人大笑之餘，即刻喝住佢：「呢啲嘢會見光死，想有鬚之人做特首，千祈唔好周圍講。」賓架R問左丁山識唔識睇相？當然唔識啦，但好記得一位現居泰國嘅華人睇相師在1996回歸前到過香港，一班人請佢在中總俱樂部食晚飯，特登考吓佢，拿出四張相片俾佢睇，問邊位會係回歸後第一位特首，相士睇完，搖搖頭，話：「四個冇個似。」我地暗暗偷笑，指住一位面貌慈祥，嘴唇夠厚嘅相片俾佢睇真啲，佢再望一輪就講：「商人面貌，好人一個，性格善良，但若然做你地特首，好唔掂。搞政治，要刻薄寡恩相，薄薄一字唇嘅人就啱嘞！」餘事不提了。
當日有段新聞，係政壇長者譚惠珠見記者，講及特首五年換人有損發展，從政制看，每五年換一次特首是很damaging的事……。譚小姐係撐梁振英連任箒啩，世界上好多國家都係每隔四五年就來一次大選嘅啦，做乜事要十年一任？北京領導人整色整水都係每五年選一次嘅啦，譚惠珠唔通想香港照抄北京，內定特首，每十年先至換班，第五年嘅選舉純粹係做戲？咁樣做，不如索性修改基本法咯，譚大律師係基本法委員會委員兼全國人大代表，有資格向中央提出建議嘅啫。飯局上有人問這是否中央意思，特登由譚大狀出口術試水溫？一位建制派老愛國立刻指出，「恐怕係譚小姐個人意見箒，放風未輪到佢！」