律師會前會長何君堯喺去年底區議會選舉中，喺屯門樂翠選區險勝民主黨何俊仁，佢噚日喺美樂花園嘅辦事處正式開張。不過，成個開張儀式似造勢大會多啲，發言嘅嘉賓都叫佢9月「再下一城」，好似民政事務局前局長藍鴻震就話嚟緊大選，提大家到時記得支持何。
未打算入鄉事黨
各個政黨、政團已經部署9月選舉，連鄉事派亦研究組黨，上水鄉委員會主席侯志強早前仲話收到逾萬份黨員申請，本身都係鄉事出身嘅何君堯就話未有入黨打算，皆因想繼續係「獨立」自由身，但被問到如果鄉事派一隊喺新西出選，會唔會分薄票源，佢認為唔入黨都可以協調。鄉事局副主席林偉強都話未打算入黨，因為唔知黨綱係乜喎。
唔少區議員搵個辦事處難過登天，甚至要喺街邊「開檔」，不過何君堯話辦事處一搵就有，前身係補習社，300呎都係7,500蚊租，最緊要係就腳，方便街坊上門喎。