踏入3月，禮賓府又係時候開放畀市民賞花。政府噚日宣佈3月13日上晝10點到下晝5點，禮賓府會開放畀市民賞花同參觀，今次除咗有導賞員帶市民參觀、介紹禮賓府歷史同建築特色外，喺遊覽路線亦放置咗好多二維條碼同展板，介紹禮賓府歷史、建築特色等。
市民仲可以用有攝影同上網功能嘅手機或流動裝置，配合相關閱讀軟件，透過二維條碼睇到禮賓府及花卉資料，此外禮賓府仲安排香港警察樂隊同學生樂團喺花園表演，等市民一邊遊覽、一邊欣賞音樂。
由於有咁多嘢睇，政府預計當日參觀者眾多，所以提醒市民，禮賓府會視乎排隊入場人數喺下晝5點截龍，希望市民留意。