立法會議員、怪醫梁家騮噚日做第4任老竇，第4名寶貝昨早大約9點出世。梁氏夫婦五年抱四，現有兩仔兩女，湊成兩個「好」字，比起千億新抱徐子淇八年抱四更有效率。怪醫話會唔會再生由太太話事，梁太就同八方講，生埋呢個就封肚，答案同千億新抱一樣。怪醫嘅大仔係2012年2月出世，之後生咗兩個女，今胎係仔。風之后李麗珊話養大一個仔女要400萬，怪醫笑笑口話真係要搏命搵錢，但唔一定要1,600萬嘅，正所謂天生天養。至於嚟緊9月立法會佢仲選唔選，怪醫話已經通知醫療界朋友，但暫時唔向八方透露。