當商務及經濟發展局局長蘇錦樑都話，如果俗稱「網絡23條」嘅版權條例本周過唔到就此作罷，似乎大局已定，但暫時無損蘇錦樑心情。
蘇錦樑噚日喺立法會繼續落力捉議員返會議廳開會，兼且再次出動美食攻勢。
可能係最後一次，蘇錦樑（圖）使出撒手鐧，勞煩蘇太出手，親自炮製4個芝士蛋糕，兩個宴請議員，兩個請記者享用。
淺黃色嘅蛋糕，面層金黃，火候恰到好處，成個蛋糕冇花臣，相信蘇太對味道信心十足。而食過嘅人都話唔錯，仲好快清晒。
雖則蘇太好手勢，但蘇錦樑大嘆無福消受，原來佢對奶類製品敏感，對於自家製芝士蛋糕，只能睇咗當食咗。