本民前梁天琦喺新東補選一役聲名大噪，首次參選就有逾六萬票，連官方喉舌《大公報》（下圖）都大讚天琦優質，令唔少政界中人嘖嘖稱奇。
噚日呢篇題為〈「三分天下」衝昏頭腦〉嘅文章，出自署名關昭執筆嘅專欄《井水集》，點名讚賞梁天琦︰「梁天琦個人是有一定質素的。」「他思路清楚、反應快捷、而且隨時隨地都知道自己在說甚麼和想說甚麼。」「眼前一些人已把他視作『可造之材』，不是無因的。」
但文章點都要保持政治正確，話希望青年用智慧同心意建設社會，督促政府改善施政，而唔係走上街頭訴諸暴力喎，同時又話天琦支持者以年輕人居多，認為特區政府應仔細研究箇中含意。
唔少網民都質疑係阿爺嘅死亡之吻、分化手段，直指：「好一招拉一派打一派」、「大公放毒？！求解藥！」