自由黨青年團不定期搞嘅Social Wednesday，本周改咗噚晚周二舉行，請咗藝人陳百祥做嘉賓（圖），皆因佢係青年團主席李梓敬嘅街坊，而李梓敬早前見阿叻喺港台節目言論咁大迴響，就請佢嚟分享吓。唔使八方多講阿叻嘅政治立場啦，佢呢日又力撐警方對付示威者嘅方式，仲話如有人搞佢屋企，會「拎佢去屯門槍斃」，又話佔中時警方放催淚彈又唔係原子彈，唔覺得有乜問題。「偉論」之多，聽到八方目瞪口呆。
阿叻過去都批評過學民思潮黃之鋒，佢呢晚又話黃之鋒書都未讀好，閒都未做到就想學人揸莊？自言作為納稅人有份「夾錢養大佢」，仲話網絡世界只係海市蜃樓，咪以為上過《時代》封面就好掂，「希特拉同侯賽因都上過」。
講到嚟緊新東補選，佢話梗係投畀民建聯；若然全民有得選，佢就實支持「自由黨嘅田北辰」喇！乜田二少又入番自由黨咩？