猴年政圈有唔少喜事，好似已育一個6歲女女嘅民建聯陳恒鑌，3月中下旬再做爸爸。雖然阿Ben同太太都知道第二胎係仔定女，但為免太太成日要因應係男係女食呢樣食嗰樣進補，阿Ben話今次同老婆都刻意保持神秘，唔畀其他人知第二胎性別喎。
當然唔少人會心思思，尤其長輩一定好想知，阿Ben直認不諱，話嫲嫲好想知BB性別，甚至出動埋阿Ben最親嘅家姐，不斷試探口風，例如話，要準備定啲BB嘢嘞喎，但阿Ben一於少理，對住家姐都封嘴唔講，強調隨遇而安。
至於佢大女，非常興奮有個細佬或妹，臨瞓前都要錫錫媽媽個肚say goodnight，但同時開始驚失寵，試過問老竇：「第時係咪冇咁錫自己？」阿Ben講明絕對唔會，阿女都好安心。