大帝總有失威時！周一NBA常規賽，騎士前鋒、「大帝」勒邦占士（LeBron James）只得12分，命中率不足28%下，球隊以88:96不敵活塞，錄得主場第五場敗仗。騎士教練路爾（Tyronn Lue）以背靠背比賽為理由，幫大帝開脫，甚至話賽前考慮過畀佢休息㖭。不過咁樣講都有欠公道，事關對手活塞亦都背靠背比賽；大帝今場18投只得五中，比率得27.8%，仲有六個失誤；佢由03年加入NBA開始，連埋今場試過三場波命中率不足28%同六次失誤，之前兩場都有14及17分，今仗應該係大帝最差勁一仗。
騎士雖然輸波，不過仍然以40勝15負排東岸榜首；而勇士同日喺有驚無險之下，以102:92作客擊敗鷹隊，成為今季首支得到50 W球隊，開季累積50勝5負，繼續向公牛紀錄（72勝10負）挑戰。