散戶愛股滙控（005）去年第四季業績遠遜預期，雖然同金融海嘯後比較，滙控家陣嘅情況好好多，至少資本情況較當年強勁。但筆者認為，如果散戶投資係但求穩陣有息收，此時唔止不宜低吸滙控，甚至連其他國際銀行股、內銀股同本地銀行股，都唔應該係考慮之列。
公用股息高風險低
睇返恒生綜合行業指數——金融業，於海嘯後嘅走勢，本港金融股同銀行股整體股價走勢有幾chok唔使多講。銀行業係百業之母，經濟好時銀行業表現自然較好，反之亦然。海嘯後唔少國家都係靠寬鬆貨幣政策吊命，營造出各國經濟復蘇嘅假象，問題係當復蘇本身唔算穩陣，銀行股自然想穩陣都難。
綜觀整體港股，由於近期唔少股份嘅股價都已跌至低殘水平，所以亦都造就咗股息率吸引嘅股份誕生，雖然當中真正低風險嘅唔多，但都唔係冇選擇。
筆者認為喺經濟麻麻嘅時勢下，收息股首選必數公用股同必須消費股。傳統公用股中電（002）、電能實業（006）同港燈（2638），都係大大隻夠安全之選，相對細隻少少嘅都仲有德永佳（321）、大快活（052）、大家樂（341）。上述股份全部股息率都超過3厘，雖然股息率唔及滙控同內銀股吸引，但風險程度就低得多。
不過筆者始終認為，環球股市整體大勢都係向下，所以要長揸收息的話，為免賺息蝕價，何不等多一陣先入貨。科斯托蘭尼曾經講過，喺指數下跌嘅過程，即使係揀到好股嘅人都會賺唔到錢。
跌市時多數股份都估值吸引，令人更難以忍手，所以筆者經常會用呢位德國股神嘅說話提醒自己唔好衝動。
El.
本欄逢周二、五刊出