呢兩日法律界熱話，就係成日見報嘅大律師陸偉雄位「公子」喺《壹週刊》登場，報道話「陸公子」喺旺角騷亂後去差館探示威者。陸大狀睇到篇報道大吃一驚，話乜咁客氣，點解佢會突然多咗個仔？原來，嗰個並唔係佢個仔！
陸大狀確有個仔，但個仔唔係如文中所講叫陸以量，相中人亦唔係佢位公子，佢仲好搞鬼咁話：「我個仔靚仔好多，因為似老竇！」至於佢位公子，現於城大讀法律，未畢業。佢笑笑口話：「如果佢好似篇文講到咁叻，𠵱家已經可以去差館代表疑犯，咁又好喎，我仲使乜做。」
記者點錯相
忽然多咗個仔，陸大狀好大量話只當笑料，唔會告人誹謗，而撰文嗰位記者噚日亦已致電佢講sorry，相信記者都係無心之失。不過佢就食住個勢，噚日返到chambers，問人𢭃多封利是，唯一驚係老婆大人問佢邊度多咗個私生子，所以先行自爆解畫。
講開佢位公子，其實係佢提議阿仔讀Law，而阿仔其實冇乜所謂，「佢見到老竇養活到一頭家，嗱，唔係兩頭呀吓！都覺得可以讀完先，畢業後想做乜，到時先決定。」陸大狀話阿仔平時都關心時事，放假時見佢成日接記者電話，就會幫手喺旁邊用電話搜尋資料，做佢私人助手。
李八方
mailto:pf_lee@appledaily.com