每逢農曆新年，就係各大小報刊暢談新年運程，生肖吉凶嘅季節，各類不同門派師傅，紛紛應邀發表文章或談話，一時之間，百花齊放，百家爭鳴，係好熱鬧嘅。左丁山有一個星期假期，在家讀報，當然亦趁吓熱鬧，凡手頭上報刊有講及猴年吉凶、運程嘅，以至鬼佬里昂證券已變成中資──（中信里昂）首創嘅「風水指數」，都抽時間細讀一番。
讀得十幾款分析評論之後，發覺各位師傅之推論方法，雖各有不同，但立論基礎大致一樣，就係猴年經濟境況不大樂觀，政治情況陷於混亂、僵硬，咁嘅情況下，大手投資、投機當然不宜，持盈保泰，謹慎處事、理財，是為共識。
左丁山在呢方面係三腳貓，只識得子平之學嘅極表面理論，過年有老友在團拜與聚會詢問運程預測之類，皆耍手擰頭，不敢作答。有一位女讀者來電郵問八卦丘會否替人算命，可否介紹……當然唔會介紹啦，八卦丘其實亦係業餘分子，不靠算命搵食，唔會見客嘅。又有人問及新年前有住宅無辜變成凶宅，恐影響樓價及健康，請左丁山邀請高人到住宅消災解毒，對唔住嘞，左丁山對家宅突然變成凶宅，極為同情，但呢啲事係幾難搞嘅，有煩讀者去寺廟搵人回家念經，當作化解一場無妄之禍便是，做介紹人恐有利益衝突之嫌。
秘書V話佢亦有睇運程一類文章，但睇極唔明，知道如要照足指示，實際上亦有困難，日日都要返工，放工，唔通日日睇住甚麼時候是吉時凶時咩，左丁山話俾佢聽，總要以平常心，善心處理一切事件，相信一句：「善有善報」就可以，如果信命運呢套說詞嘅話，必須信埋善有善報，惡有惡報，否則上天太不公道，唔信好過。善人有善心，在凶時破日行事，亦會逢凶化吉嘅，如若不然，啲惡人偷呃拐騙齊全，搵埋啲不義之財，有大把錢咪可以搵齊各類風水名師做顧問，日日趨吉避凶，以為可以長期屹立不倒？當然唔係啦，上天有上天準則，惡霸行兇慣咗，不好心腸之人連請夥計都要同夥計算咗命先，始終不會好收尾，有實例為證㗎。