年近歲晚，又係英美兩大領事館拍短片同港人拜早年嘅時候。正當港人不斷埋怨，英國身為中英聯合聲明嘅一方，眼見中國破壞香港一國兩制、高度自治時，仍然鵪鶉唔出聲，英國駐港領事吳若蘭卻喺拜年短片中，以廣東話同香港人講：「回歸接近20年，英國對香港嘅承諾至今不變，我哋會繼續堅持，同時加強同特區以及中國嘅關係。」至今不變？若蘭BB係咪應該睇吓電影《十年》呢？
送羊迎猴，若蘭BB寄語大家要好似馬騮咁靈巧機智，用明智同認真嘅方法，迎接新一年嘅機遇同挑戰。英國人最叻就係搞人心工程，若蘭BB更化晒齊天大聖大戲妝粉墨登場，但就冇開腔唱大戲。佢話今年係莎士比亞逝世400周年，領事館會舉辦名為「永恒莎翁」嘅大型紀念活動。