車路士暫代領隊軒迪克上任嗰陣，豪言要帶領球隊打入前四；雖然喺佢領軍下，車仔話就話一直保持不敗，弊在成日和波失分呢。周三英超作客屈福特，車仔踢到60分鐘先有第一次射門命中目標，結果0:0和局收場，軒帥上任後，七場聯賽已經和咗五場。
前鋒迪亞高哥斯達（DC）今場波喺進攻上冇建樹，撩事鬥非嘅老毛病就有發作，完半場前同屈福特守將桑柏利迪斯嘈，仲將對方推落地，只係領黃牌都真係算佢好彩。至於車仔新兵柏圖仲未可以上陣，但球隊對佢都有好大期望，向歐洲足協提交嘅歐聯淘汰賽參賽名單，將冇咩表現嘅法卡奧踢走，加入柏圖。
周三另一場英超，愛華頓憑中場巴克里完場前射入兩個12碼，喺主場以3:0大勝紐卡素，自從喺上年拆禮物日之後，六場聯賽以嚟首次全取三分，咁啱上一次贏波嘅對手又係紐卡素。