財經版千頌C話齋，新年時節語紛紛，姨媽姑姐好煩人。新年被親友問長問短，比解答亞視何時有糧出更難。與其學特首狂loop「一帶一路」蒙混過骨，倒不如用自己的方式作答，脫困得來而不失霸氣。（內含尖酸對話，心智未成熟者咪學）
大伯：棠仔，點解新年匿喺屋企唔出街？
答：你估我想？𠵱家通街飛來橫禍，呢頭飛粒石，嗰頭冧石屎。想落轉尖嘴，又怕被老笠，冇咗部iPhone係咪你賠？
大伯：有警察維持治安嘛。
答：我知，但重案組要徹查港大圍堵校委會事件。佢哋咁忙，邊得閒理我呢啲升斗市民。
二嫂：冇人叫你落尖嘴，睇場賀歲波唔得？
答：賀歲波變初二踢，冇外隊，仲要喺旺角場，冇晒氣氛。
二嫂：咁睇賀歲片囉。
答：新年睇《Deadpool》死死聲貪好意頭？《美人魚》又冇星爺，你唔會叫我畀錢睇《家有囍事》啩？
大學生被當廢青
三姑：咁點解唔去旅行？
答：出境仲危險，唔係話怕被失蹤，係驚寨卡病毒。一句講晒：我恐懼。
四叔：係咪冇伴咋？老老實實，拍拖未？
答：拖咩呀拖，亞視拖足你兩個月糧又唔講，咁得閒關心別人私事。
四叔：我捱多三十日就有糧出，睇怕你到時都未有着落，如果冇對象。
答：對象嘅嘢，鍾意就鍾意，唔鍾意就唔鍾意，唔好講埋啲咩L…I…K…E…
五嬸：唔講呢啲，今年有冇人工加啫？
答：匯豐夠國際大機構啦，咪一樣全球凍薪。環球經濟咁差，梗係同公司共度時艱，你以為我好似MPF班基金佬咁厚面皮？
五嬸：咁你一定好有米，幾時買樓先？
答：你叫我住「巧．岸居」定「臨．海峯」呀？有冇睇新聞㗎五嬸，樓價跌到含含聲，負資產重臨，我寧願瞓身利物浦都唔買樓囉。
六姐：阿仔都好鍾意利物浦喎，佢今年考DSE，有冇心得？
答：係咪搞錯咗呀，我當年考嘅係會考同A-Level噃。同埋呢，你個仔考唔考到十二個A先？考唔到就唔使講咁多嘢。
六姐：咁讀邊間大學好呢？
答：問得好呀，我都想知！𠵱家大學生畀人當廢青，又畀人話「poisoned by drugs」，唔夠理性喎。講真，呢個時勢讀書邊有用，叠埋心水愛國愛黨效忠祖國，間中檢舉篤灰，包保平安唔憂米。
七公：咁好冇良心啫。
答：係囉，你哋仲問。
慌張西望
撰文：杜秋棠@抽水站
原諒我只是一部國產抽濕機。
https://www.fb.com/freakingwestlook
本欄逢周五刊登